LAOAG CITY – Nagpanawagan ni Brgy. Chairman Joel Lubong Jr. iti Brgy. Imelda iti ili ti Marcos kadagiti kabarayanganna a nasken a maipakaammo iti biang na wenno iti Municipal Agriculture Office nu bilang adda dagiti baboy a pumusay.
Daytoy ket kalpasan a saan a naipakaammo a dagus ti pannakanatay ken pannakaikali ti baboy a taraken ti maysa a kabarayanggana.
Nu pay kasta, kuna ni Lubong a basar iti palawag ti maseknan nga agtagikua ti pimmusay a baboy, nagdesisyon a maikali lattan ti baboy gapu ta saan met a masinunuo nu nakaptan ti African Swine Fever (ASF).
Inbatad na nga inpakaammo pay ti agtagikua ti natay a baboy a ti nagbalin a desisyon na ket basar iti bilin ti kabsat na ken tapno awan ti mairaman nga agtartaraken ti baboy.
Immunan nga inpakaammo ni Lubong a nagsakit ti baboy sakbay a natay ken gapu iti maipagarup a pannakapakan ti baboy ti ruot a “busi-busi.”
Nu pay kasta, inyunay-unay ti kapitan a nasken a maipakaammo ti nasao a banag tapno maamoan nu adda ti pakainaigan daytoy iti ASF.
