LAOAG CITY – Inadmitir ni Barangay Chairman Lina Aguinaldo iti Barangay Parado iti ili ti Dingras nga adda ti simmangpet a maysa a kapamilya ti nagminatay iti barangay partikular iti Sitio Uno.
Segun kenni Aguinaldo, iti dimmanon kenkuana nga impromasyon ket naggapo idiay Hawaii ti nadakamat a maseknan ken napan iti probinsya ti Cagayan, sakbay a nagturong iti barangay da.
Mamati ti kapitan a saan a makarwar wenno makabyahe ti indibidwal no saan a dimmalan iti quarantine idiay Cagayan.
Sungbat daytoy ti kapitan iti dimmanon a report ditoy Bombo Radyo Laoag nga adda ti simmangpet iti barangay da nga isu ti nangitunda ti panagamak dagiti residente.
Naglikudan met ni Aguinaldo nga idi pay laeng aldaw ti Sabado a simmangpet ti maseknan no diket idi laeng malem kalman.
Inbatad na a ti simmangpet ket datin nga agnanaed iti Barangay Parado ken naikamang iti probinsya ti Cagayan.
Kunana pay a naikkan daytoy ti 24 nga oras a panagtalinaed na iti nadakamat a barangay, ken limitado laeng dagiti nagbalin a garaw na sipud simmagpet.
Malaksid iti daytoy, kuna ni Aguinaldo a kumpleto ti papeles ti maseknan kasta iti travel authority, negatibo a resulta ti swab test ken dadduma pay.
Innayon na nga awan ti nasken a pagamkan dagiti residente iti nadakamat a sitio gapo ta sumursurot da iti health protocols.
