LAOAG CITY – Naiget a naglikudan ni Brgy. Chairman Avelino Pasion iti Brgy. Pasiocan iti ili ti Bacarra dagiti alegasyon a maibatbato kenkuana.
Partikular ditoy ti maipagarup a panagbalin a benipisyaryo iti Tulong Pangkabuhayan sa Ating Disadvantaged/Displaced Workers (TUPAD) ti seaman, nurse ken balikbayan ken maitudtudo a kabagyan ti kapitan.
Segun ken ni Pasion, nasurot dagiti pagannurutan para iti panagpili dagiti agbalin a benepisyaryo ti TUPAD babaen iti Public Employment Service Office iti nasao nga ili.
Kuna na a 10 dagiti napili a benepisyaryo ken dagitoy ti awan a pulos ti naawatna a tulong pinansyal manipod iti nagduduma a programa ti gobierno.
Innayun na a naarisit a naimbag dagiti napili a benepisyaryo babaen kadagiti opisyal ti barangay.
Patien na a pamerperdi laeng dagiti alegasyon a maibatbato kontra kenkuana.
