LAOAG CITY – Inlawlawag ni Brgy. Chairman Elmar Maulit iti Brgy. Raraburan ditoy siudad ti Laoag ti maipagarup a saan na a panangsistir iti maysa a lalaki a nagkiddaw ti tulong kalpasan a narigatan nga umnages.
Immuna nga inadmitir ni Maulit nga adda ti napan iti pagtaenganda tapno agpatulong.
Nu pay kasta, inbatad na nga iti dayta a gundaway ket saan na a napupuotan dagiti nagturong iti pagtaenganna agsipod ta nakaturog daytoy.
Kuna na a gapu iti bannog na a nagmalmalem ken nagpatpatnag a panagduty na iti checkpoint ket saan na a nangngegan ti panaguni ti maseknan nga agpatulong.
Nu pay kasta, inbatad na nga apaman a nakita na ti tawag ti maseknan ket dagus nga inasistaran na daytoy bayat nga adda iti Mariano Marcos Memorial Hospital and Medical Center.
Inpakaamo na a dimmalan iti swab test ti maseknan nga indibidual ken maiyur-uray ti resulta daytoy.
Naamoan nga immunan a nagpositibo iti antigen test ti maseknan ken dumaldalan iti home quarantine idi rimuar a nagpatulong iti kapitan.
