LAOAG CITY – Kinumpirmaran a mismo iti Bombo Radyo ni Barangay Chairman Elviro Caldito iti Barangay 18, San Isidro iti ili ti Pasuquin a nagpositibo isuna iti covid-19.
Segun kenni Caldito, iti agdama ket adda ti uyek na ken naka-isolate iti Mariano Marcos Memorial Hospital and Medical Center iti ciudad ti Batac.
Inlawlawag na a sakbay pay a nakumpirmaran a positibo iti virus ket addan ti uyek na ken kabaelan na ti nasao a sintomas.
Inpakammo pay ni Caldito a dagiti dua met nga annak na a nagpositibo pay iti virus ket naka-quarantine iti isolation unit ti DPWH.
Inbatad na pay a ti maysa nga anak na ket agtrabtrabaho kas Customer Service Representative (CSR) agawid iti alas-singko iti malem nga isu laeng ti kaadda na iti barangay da partikular iti pagtaengan da.
Ummuna iti daytoy, kuna ti kapitan a nadlaw na a naguyek ti anak na ken kalpasan daytoy ket napan nagpatest nga isu ti nakakumpirmaran na a positibo iti virus.
Inpetteng na pay nga idi saan pay a nakumpirmaran a positibo ket rimrimwar tapno annungen na ti resposibilidad na kas maysa a kapitan ngem kanayon nga adda ti suot na a face mask ken face shield, ken no ado ti tao ket pumanawen isuna.
Nupay kasta, inpasigurado na nga idi na-expose isuna iti anak na ket saanen a rimrimwar ken mamati nga nakurang laeng a 10 dagiti nakapulapol na.
Kabayatanna, kuna ni Caldito a basar iti naipadanon kenkuana nga impormasyon ket naka-lockdown ti Barangay San Isidro.
Mangnamnama met ti kapitan nga iti kabiitan a panawen ket malabanan da ti virus babaen iti panagtitinnulong ken panagkararag.
