LAOAG CITY – Patien ni Barangay Kapitan Larry Pasalo iti Barangay San Marcelino iti ili ti Dingras a ti kabarangayan da a babai nga agtrabtrabaho iti maysa a call center company iti ili ti San Nicolas ti nagiwaras ti covid-19 virus iti lugar da.
Iti palawag ti kapitan iti Bombo Radyo Laoag, inbaga na a saan pulos nga inpakpakaammo ni IN-C1792 nga adda ti nakapulapol na a katrabahoan na a nagpositibo ti covid-19.
Kuna na nga uray iti balayda ni IN-C1792 ket saanda nga ammo daytoy a banag.
Inpakaammo na a naamoan da laeng a dumalan ti swab-test ti maseknan kalpasan a na-checkpoint daytoy ken idi saludsuden na no papanan na ket inbaga na nga schedule ti swab-test na.
Basar pay ken ni Kapitan Pasalo, sakbay a napan nagswab test ni IN-C1792 ket napan nakigimong isut gapu na nga ado dagiti nakapulapol na.
Gapu iti daytoy, maluksaw ken nakapungtot ni Kapitan Pasalo iti nasao a pasyente isut gapuna a pinagsasawan na ngem awan ti maaramidan na ta nalpasen.
Inpakaammo ni Pasalo nga umabot amin ti 39 dagiti nakapulapol ni IN-C1792 a dimmalanen ti swab-test idi kalman.
Kabayatanna, kinumpirmaran ni Kapitan Pasalo nga adda ti driver ti maysa a pampasahero a jeep a nangikkat iti barikada da partikular iti Sitio Casaniculasan tapno makalasat iti kalsada.
Saan a masigurado ti kapitan no napan nagpasada wenno saan ti nasao a jeepney driver iti dayta a gundaway nga inikkat na ti inkabil da a barikada.
Iti sabali a bangir, inadmitir ni Pasalo nga adda ti maysa a kagawad na a nabigbig a ni Mr. Bernardo Marcos a nagpakasar ngem inyunay-unay kadagitoy a saan dan nga aramiden dagiti nakaugalian a mapaspasamak no adda agkasar kas ti panagbitor ket dadduma pay.
Inpasingked na nga awan ti aggapo iti sabali a lugar a bisita da Marcos ken inbilin na nga amin a mapan makidaya ket ag-logbook ken kalpasan a makapangan da ket agawid dan a dagus nga isu met ti napasamak.
