LAOAG CITY – Inbatad ni Barangay Chairman Rudy Llapitan iti Barangay San Juan iti ili ti Pasuquin a saan na nga ammo no kasanu a nairaman ti nagan ti kabarangayan da a ni Ludivico Fariñas kadagiti naikkan ti tulong pinansyal iti Barangay 2 ti nasao nga ili.
Inlawlawag na nga adda ti taltalunen ni Fariñas iti Barangay 2 ngem ti pagnanaedan na ket iti barangay da.
Gapu iti daytoy, inbaga na a nakaawat ti Social Amelioration Program (SAP) ni Fariñas iti Barangay da idinto a nakaawat met ti tulong pinansyal manipod iti Department of Agriculture (DA) iti Barangay 2.
Segun ken ni Llapitan, iyuman nanto daytoy a banag iti Municipal Social Welfare and Development (MSWD) iti ili ti Pasuquin ken makaammon ton dagiti maseknan no ipasubli da ti maysa a naawat ni Fariñas.
Innayon na a saanna pay a nakasarita ti kapitan iti Barangay 2 tapno maamoan no kasanu a napasamak nga adda ti kabarangayan na a nairaman iti listaan da kadagiti naikkan ti ayuda.
