LAOAG CITY – Inadmitir ni Barangay Chairman Diosdado Aquino iti Barangay Cabaroan, Piddig, Ilocos Norte nga uray isuna ket nakigtot ti pannakairaman ti nagan ni Barangay Kagawad Roxie de Guzman iti narco-list ti PDEA.
Kinumpirmaran ni Aquino nga idi nagraira iti illegal a droga ditoy pagilyan ket nagus-usar met ni de Guzman ngem saanna pulos a naglaklako.
Nupay kasta, kalpasan a napaigetan ti kampanya ti gobierno kontra iti illegal a droga babaen ti liderato ni Presidente Rodrigo Duterte ket nagtalna metten ni de Guzman.
Kuna pay ti kapitan a nagbalin nga aktibo ni de Guzman kadagiti inyuswat a programa ti PNP ken dimmalan payen ti drugtest ta kayat na a madalusan ti nagan na gapu ta arapaap na pay ti mapan iti ballasiw taaw nga ayan ti pamilya na.
