LAOAG CITY – Saan a masinunuo dagiti opisyal iti Brgy. Araniw ditoy siudad ti Laoag ti pudno a rason iti panagpukaw ni Brgy. Chairman Richard Ancheta.
Segun ken ni Barangay Kagawad Jayson Ponce iti nasao a barangay, nagpila ti leave of absence ti kapitan idi Pebrero ngem iti laeng uneg ti barangay da.
Kuna a sipud iti naudi a panagatendar na ti sesyon iti dayta a bulan ken saanen a pulos a nagpakpakita.
Inbatad na a gapu iti panagpukaw ni kapitan Ancheta ket maitantantan amin a document ken importante a papeles a pirmaan na ken mausar dagiti residente iti Brgy. Araniw.
Inpakaammo na nga uray isuda a barangay officials ket saan a makapagsweldo gapu iti kaawan ti kapitan.
Immuna iti daytoy, dinakamat ni kagawad Ponce nga awan a pulos ti balakad ti kapitan a saan nan a plano ti agsubli iti barangay da.
Ti nasao a kapitan ket simmublat laeng iti posisyon idi Hunyo itay napan a tawen nu sadino a sinuktan na ti dati a kapitan Ruben Sampayan.
Kabayatanna, kuna ni Mrs. Janet Duarte, ti local government operations officer ditoy siudad ti Laoag a nakaawat ti tawag manipod ken ni kapitan Ancheta.
Inbatad na a basar iti kapitan ket plano daytoyen nga agipasa ti resignation gapu ta nakabirok ti sabali a trabaho.
Nu pay kasta, agpapan ita ket awan pay a pulos ti panagpakita wenno aniaman a mensahe ti kapitan kadagiti maseknan nga opisyal.
