LAOAG CITY – Nasuspenso ni Barangay Chairman Joker Ganal ti Barangay Juan iti ili ti Solsona ti 60 nga aldaw gapu iti maipagarup a falsification of public documents ken ti Serious Dishonesty and Conduct Prejudicial to the Best Interest of the Service.
Segun ken ni Kapitan Ganal, namunganay daytoy idi katugtugawna iti puesto idi Disiembre 2023 kalpasan a maipagarup nga adda ti pinirmaanna a sertipikasion ti maysa nga indibidual ngem saan met nga agnanaed iti barangayda.
Inbatadna a nailanad iti sertipikasion iti panangipalubosna iti pannakaisayangkat ti panagay-ayam ti basketball nga inorganisar idi ni dati a Sangguniang Bayan Member Marvin Pascua banag a naigetna a naglikudan daytoy.
Inlawlawagna nga awan ti malagipna nga adda ti sinertipikaranna nga aniaman a klase ti dokumento maipanggep iti daytoy a banag.
Kunana a nagkiddaw isuna a maipaayan daytoy ti orihinal a kopya ti nasao a dokumento gapu ta mamati nga alisto laeng ti agaramid ti kapada a dokumento.
Inpettengna a manarimaan a maisagsagana ti ipasana a motion for reconsideration no sadinno nga agtalek daytoy iti Sangguniang Bayan nga agbalin a patas ti panangtingitingda iti daytoy nangruna ket dua ti abugado iti konseho.
Innayonna a mamati a pammerperdi ken adda ti maris pulitikana ti napasamak kenkuana gapu ta dandanin ti pannakaisayangkat ti eleksion iti barangay.
