LAOAG CITY – Naglikudan ni Barangay Chairman Fernando Baracao, ti Barangay Salet-Bulangon ditoy siudad ti Laoag ti reklamo kenkuana a maipagarup a mabirbiruk no adda dagiti residente nga agpapirma ti dokumento iti barangay hall.
Segun kenkuana, kanayon daytoy nga adda iti barangay hall tapno aramiden dagiti responsibilidadna kas maysa a Kapitan iti barangayda.
Nupay kasta, inbatadna nga adda met dagiti gundaway nga awan isuna gapu ta adda dagiti atendaranna a taripnong iti City Hall ken Kapitolio Probinsial wenno mairana nga adda daytoy iti pagadalan.
Inlawlawagna nga agaw-awid daytoy iti rabii iti Barangay Lataag ditoy siudad gapu ta saan met a kayat ti asawana nga agnaed iti pagtaenganda iti Barangay Salet-Bulangon.
Kunana nga adda laeng naminsan a daras nga adda ti nagpapirma kenkuana iti Barangay Lataag para iti Barangay Clearance gapu ta manarimaan ti panag-review-na.
Inpettengna a napinpintas pay nga amang iti agdama ti annayas ti panangala kadagiti nagduduma a dokumento iti barangay hall-da no idasig iti naglabas nga administrasion.
Mainaig iti daytoy, inpakaammo ni Kapitan Baracao a nakarikep ti barangay hall-da tunggal Sabado ken Domingo ngem nakalukat daytoy no kasapulan nangruna no adda ti emerhensia.
Innayonna a mamati daytoy a ti nasao a reklamo kenkuana ket pammerperdi laeng gapu ta dandanin ti maisayangkat nga eleksion para iti barangay.
Kabayatanna, nagturong ti Bombo Radyo Laoag News Team iti barangay hall ti Barangay Salet-Bulangon ditoy siudad ti Laoag ket ditoy a naimatangan nga awan ti uray asinoman nga opisial ti barangay ti naka-duty.
