LAOAG CITY – Naminpinsan a naglikudan ni Bgy. Chairman George Ragonjan iti Bgy. Caruan iti ili a Pasuquin ti alegasyon kontra kenkuana a dumawdawat ti 10 a ribo a pisos kadagiti agkarga ti pebles iti bgy. da.
Segun ken ni Ragonjan, kasano a dawatan na ti kas iti kadakkel ti nasao a kantidad ket mano laeng ti kargaen da ti maysa a truck nga umabot laeng ti 3 a ribo a pisos ti balor na.
Inulit manen ni Ragunjan nga idi pay Disyembre ita napan a tawen ket pinalagipan na dagitoy nga agannad da gapu ta adddanto latta pannakatiliw da.
Naglikudan pay ti Bgy. Chairman ti alegasyon a daytoy ti nagmandar para iti reorganisasyon dagiti opisyales ti 7 Colors Cooperative ti Bgy. da tapno maiplastar na dagiti kakakadwa na ket tapno mapuligos na dagiti ulo da.
Kuna na a mismo a dagiti miyembros ti dimmatag kenkuana tapno makiballaet iti parikot gapu ta uppat ken kagudua a tawenen nga awan ti meeting ti kooperatiba.
Gapu na kuna ti Kapitan nga inton Domingo ket adda maangay a meeting ken masapul nga idatag dagiti opisyales ti librita de bangko ken resibo dagiti naggustuan.
Mamati ti kapitan nga iti dayta a kabayag nga awan meeting ti kooperatiba ket saan a napakpakaamuan dagiti miyembros ti pudno nga estado ti kooperatiba da.
