LAOAG CITY – Inlawlawag ni Barangay Chairman Angelus Ulep ti Brgy. 18 iti ili ti San Nicolas a no apay nga awan ti inbunongda a relief goods kadagiti residente.
Segun kenkuana, awan ti inpaay ti lokal a gobierno iti ili ti San Nicolas a relief goods iti barangayda rason nga awan met ti inbunongda kadagiti kabaranggayanda.
Inbatadna a no ti barangay ti mangipaay ti relief goods ket saan nga umdas wenno saan a sapasap amin ti maikkan ti ayuda.
Inlawlawagna a mamati isuna a saanen a nangipaay pay ti lokal a gobierno ti relief goods gapu ta awan met ti nalayos a kabaranggayanda gapu iti iduduprak ti Bagyo Julian ditoy probinsia iti kallabes.
Mainaig iti daytoy, inpakaammo ni Mr. Dennis Villa, mangidadaulo ti Municipal Social Welfare and Development Office iti ili ti San Nicolas nga awan ti naawatda a report manipud iti maseknan a barangay.
Immuna iti daytoy, adda ti dimmanon a reklamo ditoy Bombo Radyo Laoag nga awan ti naawat a relief goods dagiti residente iti Brgy. 18 iti ili ti San Nicolas idinto nga adda met ti naawat nga ayuda dagiti dadduma a barangay.
