LAOAG CITY – Inbatad ni Barangay Chairman Gilbert Martillano iti Barangay 51-A, Nangalisan ditoy ciudad ti Laoag a saan a naipakammo kenkuana a dimmalan iti swab test a kabarangayan na wenno ni IN-C580.
Inadmitir pay ti kapitan nga iti laksid a dimmalan iti swab test ti nasao nga indibidwal ket rimwar latta iti pagtaengan da.
Segun kenni Martillano, tubo iti Bantay, Ilocos Sur ti pasyente ken nabayagen nga adda ditoy ciudad ti Laoag ken nakaala ti pwesto na para iti carinderia iti Laoag City General Hospital.
Kunana nga idi naipakaammo kenkuana a positibo iti virus ni IN-C580 ket dagus da napan binantayan ti indibiwal ken naibalakad nga ag-isolate agingga a saan a sukunen ti City Health Office.
Mainaig iti daytoy, kuna ni Barangay Kagawad Rey dela Cruz, chairman ti Committee on Health nga agpatpataya ti STL ni IN-C580 rason a dagiti nagtaytaya kenkuana ket ipakammo da iti CHO wenno kadakuada nga opisyales.
Inbaga na a masansan a pagpatpatayaan na ti STL ket kadagiti empleado ti maysa a pasdek a karruba ti pagtaengan da.
Kabayatanna, manamnama met a dumalan iti swab test iti kabiitan a panawen.
