LAOAG CITY – Pimmusay ti kapitan iti Barangay Ferdinand iti ili ti Marcos kalpasan a napalto-paltogan iti Barangay Tabucbuc iti nasao nga ili.
Nabigbig daytoy a ni Barangay Captain Helen Abrigado iti Brgy. Ferdinand ken dati a Sang. Bayan Member idinto a saan pay a nabigbig dagiti suspek.
Segun kenni Police Major Jonavale Maramag, ti chief of police ti Philippine National Police iti ili ti Marcos, kalpasan ti lantern parade ket agawiden ti biktima a nakalugan iti Mitsubishi L300 FB a kukua ti Barangay Ferdinand ken inturong ni Brgy. Kagawad Carlo Bagaoisan ken idi adda da iti karayan iti paset ti Brgy. Tabucbuc ken nakangeg da ti putok ti paltog.
Inbatad na a kalpasan daytoy ket dua a lallaki a nakalugan ti black Honda Wave Motorcycle ti immabay iti nagluganan ti biktima ken pinalto-paltogan da daytoy.
Gapo iti daytoy, nagsagaba ti biktima ti tama ti paltog kangrunaan na iti kannawan a paset ti bagi na ken dagus a naitaray iti Doña Josefa District Hospital babaen kenni Kag. Bagaoisan ngem naiyakar daytoy iti Mariano Marcos Memorial Hospital and Medical Center iti ciudad ti Batac.
Innayon na a dagiti met suspek ket dagus a naglibas ken nagturong iti abagatan a daya iti nasao a lugar.
Kabayatanna, agtultuloy ti imbestigasyon dagiti kameng ti Philippine National Police seknan iti pammaltog ken para iti pannakabigbig dagiti suspek.
