LAOAG CITY – Inlawlawag ni Brgy. Chairman Myar Gonzales iti Brgy. 7, Gaang iti ili a Currimao a saan a maitantantan ti honorarium dagiti Brgy. tanod iti nasao a barangay.
Segun kenni Gonzales, datin a tunggal agngudo ti bulan ti panangited da ti honorarium kadagiti tanod ngem nabalbaliwan daytoy iti ummuna a lawas ti bulan kas panangsurut iti pagalagadan nga inted ti Department of the Interior and Local Government wenno DILG.
Inbatad met ni Brgy. Treasurer Merlita Comamo a saan a naladaw nga it-ited na ti honorarium dagiti maseknan gapu ta masursurut met ti naituding nga aldaw pakairamanan dagiti Barangay Kagawad ken dagiti kameng ti Lupon ng Tagapamayapa.
Inpagunam-gunam na nga adda pay laeng ti pagdalanan dagiti dokumento dagiti maseknan sakbay a maiyawat ti honorarium da
Inpalgak na nga adda dagiti sumagmamano a nasusukir a tanod a saan a mapmapan kadagiti naibaon kadakuada rason a mamulta dagitoy ti limapulo a pisos a dagus a maikissay iti limagasut a pisos nga honorarium da.
Kabayatanna, inpakaammo ti Brgy. Chairman a napagnunumoan da daytoy a banag iti naisayangkat a taripnong ti barangay ken amin dagitoy ket kimmanunong iti panagkissay ti honorarium ti saan a sumursurot ti pagalagadan da.
