LAOAG CITY – Inlawlawag ni Brgy. Chairman Valentino Ranada, ti Brgy. Gaang iti ili ti Currimao nga awan iti kinapudnona ti agwarwaras nga impormasion babaen iti online a maipagarup a pinapatayda dagiti natiliwda a walang nga aso iti nasao lugar.
Nupay kasta, inadmitirna nga agtiltiliwda kadagiti walang nga aso nga adda kadagiti tengnga ti kalsada a makaitunda pay ti degrasia.
Inbatadna nga adda ti naiyatnag nga ordinansa iti barangayda no sadino matiliw dagiti walang nga aso ken mamulta dagiti akin-taraken kadagitoy ken agbayadda ti 500 a pisos.
Kunana nga adda ti dog pound nga inaramid ti barangayda tapno adda ti pakaikabilan dagiti matiliwda a walang nga aso.
Iti agdama, inpalgak ni Kapitan Ranada a naisubli metten amin dagiti aso a natiliwda kadagiti akinkukua kadagitoy a sumagmamano nga aldaw a temporario a naipupok iti dog pound ti barangay.
Kabayatanna, inpakaammona nga awan dagiti residente iti lugarda a nagpositibo iti rabies gapu kadagiti walang nga aso.
Immuna iti daytoy, inrakurak ni Provincial Veterinarian Dr. Loida Valenzuela nga adda ti naputar a Provincial Rabies Ordinance a nasken laeng nga ipatungpal dagiti maseknan nga opisial.
