LAOAG CITY – Inlawlawag ni Barangay Chairman Alexis Abella iti Brgy. Gayamat iti ili ti Piddig ti reklamo dagiti lumugar mainaig iti pannakaited dagiti ayuda a japanese rice iti mismo a manugang ken katugangan na a saan a naapektaran iti naglabas a didigra.
Inbatad na a sakbay ti pannakaibunong ti bagas ket naisayangkat ti sesyon ti konseho a no sadinno a napagnunumuan a dagiti kagawad ti mangpili kadagiti kalugaran da a kangrunaan a napakaruan iti napalabas a didigra.
Segun kenkuana, sag-lilima a tattao iti kada kagawad agraman kenkuana ti maikkan iti ayuda ngem masapul a dagiti kangrunaan a naapektaran.
Naglikudan na nga inikkan na ti katugangan na ken ti manugang na iti nasao a bagas kas iti reklamo kontra kenkuana a naipadanun iti Bombo Radyo.
Naamuan a 30 a kilos ti bagas ti naited iti kada nairekumendar a tao.
Kabayatanna, malaksid ken ni kapitan a naireklamo, naireklamo pay ni Kagawad Bobster Tomas gapu iti maipagarup a saan na a panangsurot ti inbilin ti DSWD a wagas a pannakabingay ti ayuda.
Daytoy ket gapu ta ti 30 a kilos a Japanese rice a naited kadagiti maseknan ket pinaggugudua na.
Inadmitir ni Tomas a diskarte na daytoy gapu ta maasyan kadagiti tallo nga indibidwal rason a biningay na daytoy.
Inpetteng na nga agnanaed ti dua a pamilya iti maymaysa a pagtaengan dagitoy rason nga pinagbingay na ti maysa a sako idinto a ti dua a residente a napili na ket buo a 30 a kilos ti inted na.
