LAOAG CITY – Inpetteng ni Barangay Chairman Bang Rarangol iti Barangay Nagpatpatan iti ili ti Solsona nga awan ti inisyu na a permit to construct iti maysa a kompanya mainaig iti panangipatakder ti cell site tower.
Daytoy ket kalpasan a naduktalan na nga addan ti nakali babaen iti nasao a kompanya iti barangay da.
Segun kenni Rarangol, idi naipakammo kenkuana daytoy nga impormasyon ket nagturong da iti lugar ken nakumpirmaran da nga agkalkali dagiti sumagmamano nga indibidual.
Inlawlawag na a ti laeng inpaay na iti kompanya ket ti permit to survey ken awanen ti sabali.
Kunana ti ipetpetteng met ti nasao a kompanya ket adda ti inpaay kadakuada ti municipyo.
Gapo iti daytoy, inreport na iti PNP ti pasamak ken nagturong met dagiti kameng ti pulisya iti Municipal Engineering Office ken naduktalan nga awan ti inisyu ti barangay a permit to Construct.
Naamoan a kalpasan daytoy ket inbilin ti Municipyo ti pannakaipasardeng ti panagkali nga isu met ti inaramid dagiti maseknan.
Nupay kasta, kunana nga idi nakatalikod da a barangay officials pakairamanan dagiti kameng ti PNP ket intuloy ti kompanya ti nagkali.
Mainaig iti daytoy, inbatad ni Rarangol a kalpasan a naala ti kompanya ti permit to survey ket saan dan a nagsubli kenkuana isut gapo a nakigtot iti narugyan ti panagkali.
Inpalgak na a gapo iti daytoy a pasamak, addan ti panagdudua ni Rarangol no ikkan na pay ti Permit to Construct ti kompanya.
