LAOAG CITY – Naglikudan ni Brgy. Chairman Avelino Pasion ti Brgy. Pasiocan iti ili ti Bacarra ti maibatbato nga akusasion kontra kenkuana.
Daytoy ket kalpasan nga adda ti dimmanon nga impormasion ti Bombo Radyo Laoag a maipagarup a masansan daytoy a mabarbartek rason a saan a mapmapan iti Barangay Hall tapno maaramid dagiti responsibilidad na kas mangimatmaton ti Barangay.
Segun ken ni Pasion, awan ti kinapudno na daytoy a banag gapu ta ar-aramiden na met amin a trabaho na iti uneg ti Barangay kas iti panangpirma kadagiti mangal-ala ti Barangay Clearance a kabaranggayan na.
Inbatad na nga adda pay ti gundaway nga iti pagtaengan na ti pagpirmaan na kadagiti maaw-awat na a Certificate wenno Clearance ti Barangay.
Mamati a pammerperdi laeng daytoy kenkuana nangruna ket mapaspasangasanganen ti eleksyon no bilang man matuloy ti pinagbubutos kadakuada a Punong Barangay inton sumaruno a tawen.
Innayon na nga awan met ti malagip na a nakariri na a mabalin nga isu ti maitudo na a nangireklamo kenkuana,
Mainaig iti daytoy, kinarit ni Pasion ti maseknan nga agrekreklamo kontra kenkuana nga agpakita ken dumatag iti mismo a Barangay Hall da ken ditoy na a sungbatan dagiti dadduma pay nga alegasion kenkuana.
