LAOAG CITY – Nadismaya ni Mrs. Janet San Jose, agpapaay iti maysa a pagmikian iti Barangay Sta. Maria ditoy ciudad ti Laoag kalpasan a maipagarop a saan a kayat ni Barangay Chairwoman Jiliana Ramos a maikkan da ti barangay certificate.
Inlawlawag ni San Jose nga usaren da koma ti nasao a sertipikasyon para iti panag-transfer da ti pagbotosan.
Segun ken ni San Jose, iti agdama ket nakarehistro da iti La Union ngem gapu ta nabayagen nga agnanaed ken agtrabtrabaho da iti pagmikian a kukua ni Mr. Joseph Agullan ket napanunot da iti asawa na nga agrehistro da laengen iti Barangay Sta. Maria tapno isunton ti pagbotosan da iti sumaruno nga eleksyon.
Nupay kasta, masdaaw ni San Jose gapu ta saan a kayat ti kapitana a maiyisoan da ti barangay certificate no sadinno a ti rason na ket agimbestigar paylaeng no pudno nga agnanaed da iti masakopan na a barangay ken no nasayaat metlaeng dagitoy a tao.
Inpakaammo ni San Jose a ti damo a papanda panagkiddaw ti barangay certificate ket idi Marso 13 ngem pinagsubli ida ti barangay secretary gapu ta iti dayta a gundaway ket awan ti nasao a kapitan.
Innayon na nga iti panagsubli da iti asawa na ket naipakaammo kadakuada a maipagarop a saan a kayat ti kapitan a maikkan da ti dawdawaten da a sertipikasyon.
Kabayatanna, inpakaammo ni Mr. Agullana nga agdaman nga agnanaed idiay Canada nga isuna a mismon ti nakisarita iti barangay secretary babaen iti telepono nga agnanaed kadakuada da Mrs. San Jose ken ti asawa na ken dagitoy ket nasayaat ken mapagtalkan a tattao, ngem maipagarop a saan paylaeng a nakaumanay daytoy iti kapitan.
Inadmitir ni Mr. Agullana nga iti napalabas nga eleksyon ket saan a ti agdama a kapitan ti sinuportaran na ngem nakapagsarita dan idi nagbakasyon no sadinno a nagkiddaw pay ti igatang da ti uniporme da nga opisyal ti barangay.
Kuna pay ni Agullana nga iti panagsarita da iti kapitan ket ditoy nga inpeksa ti opisyal ti sakit ti nakem na kenkuana gapu ta saan nga isuna ti sinuportaran na iti napalabas nga eleksyon.
Inpagarop ni Agullana a kalpasan iti panagsarita da iti kapitan ket naurnusen ti amin kadakuada isut gapuna a masdaaw no apay a saanna a kayat nga ikkan ti barangay certificate kadagiti agasawa nga agtrabtrabaho kadakuada.
Inpaganetget ni Agullana a saan laeng nga agtrabtrabaho dagiti agasawa iti pagmikian da no di ket isuda payen ti kadkadwa ti ina da.
Mainaig iti daytoy, iti pannakisarita ti news team ti Bombo Radyo Laoag ket inpakaammo na a nakasarita na dagiti agasawa a San Jose ken inbilin na mangayab da ti maysa nga indibidual a mangpaneknek nga isuda ket nabayagen nga agnanaed da iti nadakamat a barangay, ngem maipagarop a saanen a nagsubli dagitoy.
