LAOAG CITY – Inlawlawag ni Brgy. Chairwoman Rodalyn Dela Cruz ti Brgy. Lagui-Sail ditoy siudad ti Laoag nga adda ti bayad ti mangala ti Barangay Clearance para iti Good Moral kas naiyataday iti ordinansa iti barangayanda.
Segun kenkuana, dua a clearance ti innala ni Mr. Bernadil Calderon Jr. iti barangayda, ti First Time Job Seeker ken ti Barangay Clearance para iti Good Moral no sadinno ket libre ti First Time Job Seeker idinto a 50 a pisos ti bayadna ti Barangay Clearance para iti Good Moral.
Inbatadna a nagkiddaw ti maseknan a residente kadagiti nasao a clearance para iti panagaplikarna iti trabaho idiay Manila.
Inlawlawagna nga awan ti kinapudnona a binugkawanna ti kabaranggayanna idi napan nangala kadagiti nadakamat a clearance.
Mainaig iti daytoy, kuna ni Kapitana Dela Cruz a naipakaammo met daytoy a banag kadagiti residente iti naiyuswat a taripnongda iti Barangay.
Innayonna a nasakit ti nakemna gapu ta nai-post pay iti online ti reklamo ti kabaranggayanna.
