LAOAG CITY – Inlawlawag ni Brgy. Chairwoman Nora Sicat, ti Brgy. Pangil iti ili ti Pasuquin a saanna nga ipalubos kadagiti kabarangayanna nga agpukan ti kayo nga awan ti permit-na.
Inbatadna a ti kinapudnona ket inpakita ti akinkukua ti narra kenkuana ti permit-da manipod iti Department of Environment and Natural Resources iti ili ti Bangui sakbay a nagpukanda gapu ta kalikagumda nga ilako daytoy.
Kunana a binaon ti akinkukua ti narra ti kabsatna a Barangay Tanod nga isu ti mangpukan iti daytoy.
Inpalgakna nga adda pay ti nakapaskil a tarpaulin iti mismo lugar a nagpukanan kadagiti nasao a kayo a nakailanadan ti pannakaipalubos nga agpukanda.
Mainaig iti daytoy, segun ken ni Brgy. Chairwoman Sicat a ti proseso ti pannakapukan ti kayo ket nasken a mangala dagiti maseknan ti Barangay Certificate a mangited ti pammalubos iti panangpukan kadagiti kayo malaksid laeng dagiti dokumento nga alaenda iti Department of Environment and Natural Resources.
Kunana a nakumpirmaranda iti nasao nga ahensia ti gobierno a mabalin a pukanen ti narra laketdi adda dimmalan daytoy ti umiso a proseso.
Inpakaammona nga adda ti 11 a puon ti kayo ti narra ti mapukan a naimula iti lote nga addaan ti kalawa a 300 square meters.
Innayonna a mamati daytoy nga adda ti maris pulitika iti likudan dagiti pammerperdi kontra kenkuana.
