LAOAG CITY – Inbatad ni PLt. Janery Samoden, ti acting spokesperson ti Ilocos Norte Police Provincial Office a naiget ti panagsagsagana ti kapulisan iti manamnama a long weekend ken pannakaobserbar ti All Saints ken All Souls Day wenno iti UNDAS 2022.
Segun ken ni Samoden, addan dagiti nadutukan a mai-deploy iti nagduduma a kamposanto iti intero a probinsya.
Kuna na a kadua ti kapulisan dagiti force multipliers, barangay tanod, Highway patrol group ken nagduduma pay nga advocacy groups ditoy Ilocos Norte.
Immuna iti daytoy, inpakaammo ni Samoden a kabayatan ti pannakaobserbar ti All Souls ken All Saints day ket maipawil ti agitugot iti kamposanto kadagiti natadem a banag, arak, makaitunda ti uram, napigsa a radyo wenno speaker ken panagsugal.
Inbatad ni Samoden a babaen iti nasao nga addang ket maliklikan ti gulo wenno aniaman a mangitunda iti risgo kadagiti bumisita iti kamposanto.
Kabayatanna, inpakaammo ni Samoden a manamnama a naruay a turista ti agpasyar ditoy probinsya ken ado dagiti agawid a kaprobinsyaan manipod iti nagduduma a lugar.
