LAOAG CITY – Nagsagaba ti sugat iti nagduduma a paset ti bagi ti maysa a lalaki kalpasan ti panagkakarambola dagiti uppat a lugan iti national highway a sakop ti Brgy. 40-Buyon iti ili ti Bacarra.
Basar iti imbestigasyon ti PNP-Bacarra, naggapo iti bypass road ti kurong-kurong nga inturong ti agtawen ti 54 a negosyante ken residente iti Brgy. Paet iti ili ti Vintar.
Nu pay kasta, apaman a natapugan na ti national highway ket dita a nadungpar na ti agpaamianan a direksyon a mercedes benz a van nga inturong ti agtawen ti 50 ken residente iti Brgy. 21 – Libtong iti ili ti Bacarra.
Gapu iti kinapigsa ti panagdinnungapar dagiti dua a lugan, naipurwak ti kurong-kurong iti bangir a lane ket dita a nadungpar na met ti agsungad iti amianan a toyota corola nga inturong ti agtawen ti 28.
Kabayatanna, naiderderetso ti Van iti maysa nga L300 nga inturong ti agtawen ti 58 ken residente iti Brgy. Baruyen iti ili ti Bangui.
Nagtalinaed iti ospital ti nangiturong ti kurongkurong gapu kadagiti sinagaba na a sugat idinto a saan a naan-ano dagiti dadduma a driver.
Mainaig iti daytoy, desidiso dagiti karaman iti insidente nga ibaklay ti nangiturong ti kurong-kurong ti gastos para iti danyos dagiti nadadael a lugan.
Immunan nga inpakaamo dagiti imbestigador iti PNP-Bacarra a saan a nakarkulo ti driver ti kurong-kurong ti distansya iti van a sumungad rason a dineretso na ti limmasat iti national highway.
