LAOAG CITY – Umdas pay laeng ti suplay ti karne ti baboy iti ili ti Dingras.
Daytoy ti kinumpirmaran ni Mr. Cornelio Baldecino, ti Municipal Agriculture Officer iti nasao nga ili.
Daytoy ket kalpasan nga inpakaammo ni Dr. Loida Valenzuela, ti Provincial Veterinarian a bimmassit dagiti taraken a maparti kadagiti sumagmamano nga ili ditoy Ilocos Norte gapu pay laeng iti epekto ti African Swine Fever Virus.
Segun ken ni Mr. Baldecino, dakkel ti katulungan ti inyuswatda a survey itay kallabes tapno maduktalan ti bilang dagiti taraken a baboy iti ilida tapno maammoanda no agkurkurangen ti suplayda.
Kunana a babaen iti daytoy, kampanteda a saan nga agkurkurang ti suplayda ti karne ti baboy iti baet ti pangta ti ASF virus kadagiti taraken a baboy.
Inlawlawagna nga awan met pay ti panagbalbaliw ti presio ti karne ti baboy iti merkado publiko iti ili ti Dingras gapu ta nagtalinaed a sag-240 pesos iti kada kilo banag a naigetda a banbantayan daytoy.
Maipalagip a basar iti nakalap a resulta iti survey ti Municipal Agriculture Office ti Dingras ket umabot ti 14, 495 a baboy.
