LAOAG CITY – Nagsagaba ti nakana a sugat iti ulo ti maysa a lalaki a nakamotorsiklo kalpasan a nadungpar na ti urbon a baka iti national highway a paset ti Barangay Lydia iti ili ti Marcos.
Daytoy ti kinumpirmaran ni Police Capt. Jonvale Maramag, ti chief of police iti nasao nga ili.
Binigbig ni Maramag ti biktima a ni Eljay Danao, agtawen ti 18, baro, mekaniko ken residente iti Barangay Daquioag iti nasao nga ili.
Inbaga ni Maramag a basar iti imbestigasyon da, kabayatan ti panagpapa-amyanan a direksyon ti biktima ket kellaat a bimallasiw ti nasao a dingwen.
Gapu iti daytoy, nadungpar ti biktima ti baka a nagresulta ti pannadesgrasya na ken nakasugatan ti ulo na idinto a natukkol ti saka ti nasao a dingwen.
Naitaray ti biktima iti Doña Josefa Edralin District Hospital iti ili ti Marcos ngem naiyakar iti Mariano Marcos Memorial Hospital and Medical Center iti ciudad ti Batac para iti naan-anay a pannakaagas na gapu ta naawanan ti poot iti pannakadesgrasya na.
Agpapan maisursurat daytoy a damag ket saan pay a masinunuo no anian ti kondisyon ti biktima gapu ta saan a makontak ti PNP-Marcos ti pamilya ni Danao.
Naestablisar metten dagiti otoridad no siasinno ti akin-taraken ti urbon a baka a nadungpar ni Danao.
