LAOAGC CITY – Natay ti maysa a lalaki a nangiturong ti motorsiklo kalpasan a nadesgrasya iti national highway iti paset ti Barangay Billoca iti ciudad ti Batac.
Binigbig ni Police Major Artemio Clemente, OIC iti PNP-Batac ti biktima a ni Rovic Manuel y Malabed, agtawen ti 19, karpintero ken residente iti Barangay Bungon iti met laeng nasao a ciudad.
Inbatad na nga iti imbestigasyon da, kabayatan ti panagpapa-amyanan a direksyon ni Manuel iti National Highway ket nadungpar na ti concrete barrier iti lugar.
Inbaga na a possible a napaspas ti taray ti motorsiklo ti biktima ken nakainom daytoy ti arak.
Kuna na a mabalin pay a nakaturog gapu ta nawasnay ti kalsada a nangitunda ti pannakaidungpar ti biktima iti concrete barrier.
Gapu iti kapigsa ti impact ti pannakaidungpar ti biktima ket naburak pay ti helmet na a nagsagabaan na ti nakana a sugat kangrunaan na iti ulo na.
Naitaray ti biktima iti Mariano Marcos Memorial Hospital and Medical Center iti ciudad ti Batac ngem naideklara daytoy a dead on arrival.
