LAOAG CITY – Maisagsaganan ti kaso a maipila kontra iti maysa a babai a nagtakaw iti maysa a boarding house iti paset ti Barangay 29 ditoy ciudad ti Laoag.
Nabigbig ti suspek a ni Necita Mabanag y Calaramo, agtawen iti 51, awanan ti asawa, taga Brgy. 2, San Pedro, iti ili ti Vintar ngem agdama nga agnanaed iti Barangay 29 ditoy ciudad idinto a ti nagbalin a biktima na ket ni Heicel Joie Agpaoa, agtawen iti 28, balasang, service receptionist, ken agdama nga agkaskasera ti nasao a barangay.
Iti imbestigasyon, inbatad ti biktima nga iti panagawid na iti kasera na ket nadiskubre na a mapukpukaw ti lecklace ken singsing na nga agbalor iti $375.
Inbatad na nga iti panagtext na iti suspek ket inpakaammo na nga indulin na laeng dagiti alahas na.
Nupay kasta, saanen a napan nagpakita ti suspek ken saan pulosen nga agsungsungbat kadagiti text ti nasao a biktima agpapan ita.
