LAOAG CITY – Inbasura ti korte ti kaso a murder ti dati a Mayor iti ili ti Dingras a ni Marynette Gamboa.
Segun ken ni Atty. Juanito Antonio, maysa kadagiti abugado ti dati a Mayor, daytoy ti mangipaneknek nga awan ti basol ti klientena kadagiti pammabasol kenkuana.
Inbatadna nga awan ti nadagsen nga ebidensia manipud iti prosekusion a nangpatibker iti naipila a kaso kontra iti dati a Mayor isut gapuna a na-acquit daytoy.
Gapu iti daytoy, inlawlawagna a naan-anayen a nawaya-wayaan ni Gamboa ken mangipasimudaag nga awan ti aniaman a pakainaiganna iti maitudtudo nga isuna ti mastermind wenno akin-utek iti pannakapapatay ni dati nga Ilocos Norte Electric Cooperative wenno INEC Board President Lorenzo Rey Ruiz idi 2009.
Inpettengna a nakapagpiyansa ti 400 a ribu a pisos ni Gamboa para iti temporario a pannakawaya-wayana idi Disiembre 2023 kalpasan a pinatgan ti korte ti kiddawda gapu ta nalag-an ken saan nga umdas dagiti naidatag nga ebidensia.
Mainaig iti daytoy, inpakaammo ni Atty. Joel Garcia, maysa pay kadagiti abugado ni Gamboa a nasken nga agragsak ti klientena gapu iti balligi a pannakagun-od ti hustisia.
Maipalagip a natiliw ni Gamboa idiay Calamba, Laguna babaen kadagiti kameng ti National Capital Region Police Office (NCRPO) babaen iti bileg ti warrant of arrest nga inparuk-at ni Judge Felix Salvador gapu iti kasona a murder.
Immuna iti daytoy, namindua a daras a saan a nakaatendar iti promulgation ni Gamboa gapu ta naitaray iti ospital idiay Metro Manila kalpasan a ngimmato ti blood pressure-na.
