LAOAG CITY – Mamati ni Atty. Rey Gorgonio a possible a nailemmeng ti eye witness iti napasamak a pammaltog a nakatayan ti agnagan ti Washington “King” Felipe Jr. idi tawen 2017 tapno saan a mailanad dagiti pudpudno a suspek.
Ni Atty. Gorgonio ti nangiyabogado kadagiti akusadao a da Bernardino Andres Gorgonio kenni Julian Verdadero Tomas Jr a napilaan ti kaso a murder iti kallabes ngem nadismiss itay napan a tawen gapu ti kinakurang ti ebidensya kontra kadakuada.
Inlawlawag ti abogado a saan a nagpada iti palawag ti agnagan ti Mary Jesamin Tagama iti napasamak kabayatan ti cross examination iti korte a nakadengngegan ti kaso.
Ti palawag ni Tagama iti korte a napaltogan ni Felipe bayat ti panagturong da iti Brgy. Furtona iti ili ti Marcos babaen dagiti simmurot a nakalugan ti mio motorcycle idinto a nakalugan iti likod ni Tagama ken a kadua da dagiti tallo nga annak da.
Kuna ni Gorgonio a saan a nagpada ti palawag ni Tagama ken ti palawag ti doktor a nangeksamen iti bangkay ti biktima seknan dagiti tama ti bala ti paltog a sinagaba ni Felipe.
Para kenni Gorgonio a nagserbi ti napabasol a kabsat na kenni Tomas kas kalob iti pudpudno a suspek iti pannakapapatay ni Felipe.
Iti mainaig a damag, porsigido ni Atty. Gorgonio a pilaan met dagiti ibilang na a nagswitik a testigo mainaig ti kaso kontra kada Bernardino Andres Gorgonio kenni Julian Verdadero Tomas Jr.
Kuna na a kaso a Perjury ti maipila kontra kenni Mary Jesamin Tagama ken kaso administratibo dagiti kameng ti PNP a nagswitik.
Basar iti dukomento nagtestigo dagiti pulis nga isuda PO3 Jay-Arr Joy Agtang, SPO1 Reuby Sagun, kenni PSI Amiely Ann L. Navarro.
Innayon ni Gorgornio a manamnama a maipila ti kaso no malpas ti pannakaisagana na dagitoy.
