LAOAG CITY – Mapilaan ti kaso a qualified theft ti cashier ti maysa a sari-sari store gapo iti panangala na ti kwarta a naglakoan ti pasdek n ga adda iti Laoag City Public Market and Commercial Complex.
Daytoy ti inbatad ni Police Lt. Col. Rafael Lero, ti chief of police ti PNP-Laoag.
Segun kenni Lero, ti suspek ket agtawen ti 42 ken residente iti Barangay 28 ditoy ciudad.
Inbatad na a nakita dagiti kaubraan ti suspek nga adda ti inlemmeng na a kwarta iti karton ti face shield na.
Gapo iti daytoy, inpulong dagiti nakakita iti manager da ken dagus a nagpaayab ti maseknan iti otoridad.
Kunana nga idi agimbestigar dagiti pulis ket inlibak ti suspek nga adda ti ilemmeng na a kwarta ngem inadmitir na met laeng kalpasan a naibaga nga adda ti nakakita iti inaramid na.
Narekobre iti karton ti faceshield ti sangapulo a ribo a pisos.
Naamoan a ti suspek ket awan ti madi a rekord na iti biang ti Philippine National Police.
