LAOAG CITY – Naipilan ti kaso a syndicated estafa kontra kadagiti innem a dati ken agdama nga empleado ti Ilocos Norte Electric Cooperative wenno INEC iti National Bureau of Investigation wenno NBI babaen ti tulong ni NBI Assistant Director for Intelligence Services Noel Bocaling.
Daytoy ket gapu iti mapukpukaw a 118 Million Employees Retirement Fund.
Inasistiran ni National Electrification Administration Administrator Antonio Mariano “Nani” C. Almeda ni Ilocos Norte Electric Cooperative Acting General Manager Perry Martinez tapno maipila ti kaso.
Mainaig iti daytoy, inpasigurado ti Ilocos Norte Electric Cooperative ken ti National Electrification Administration a saanda nga ipalubos a malusotan dagiti maseknan daytoy gapu ta masapul a maikkanda ti pagmenna-mennaan ken daytoy a pundo ket pinagbannugan dagiti empleado ti naunday a panawen.
Basar iti kooperatiba, daytoy nga addangda ket pammalagip mainaig iti Republic Act No. 4917 of 1967 kabayatan ti Presidency of the Father of Rural Electrification, Apo Lakay Ferdinand E. Marcos Sr. a ti retirement fund ket saan a mabalin a mausar iti aniaman a banag malaksid ti retirement.
