LAOAG CITY – Manamnama a maipila intono Lunes, Abril 22 ti kaso a direct assault kontra iti maysa a lalaki a nangdangran kadagiti dua a pulis a nagresponde iti napasamak a desgrasya iti paset ti Gilbert bridge ditoy ciudad ti Laoag.
Nabigbig daytoy ni Cadelario dela Cruz, agtawen ti 55 ken residente iti Barangay 3, Loing iti ili ti Piddig ken dagiti biktima a pulis nga isuda Patrolman Julius Castro ken Patrolman Paul Rosete, imbestigador ti PNP-Traffic Division ditoy ciudad.
Maipalagip a bayat nga agpapaamyanan a direksyon ni Dela Cruz iti rangtay ket nadungpar na ti center railing.
Basar iti inisyal nga impormasyon, idi nagresponde da Castro ken Rosete ket saan a nakikoordenar ni dela Cruz ken maipagarop a sinipat na ti muging, intumeng na ken pinagsawsaw-an na dagiti pulis.
Iti agdama ket nagtalinaed iti kustudiyar ti PNP-Laoag ti nasao a suspek.
