LAOAG CITY – Inpilan ti PNP-Pinili iti piskalya ti kaso a reckless imprudence resulting to physical injury ken direct assault kontra iti nakamotorsiklo a nakapadungpar kenni Police Major Jephre Taccad, chief of police iti nasao nga ili.
Daytoy ti kinumpirmaran ni Police Master Sergeant Noel Gamit, chief investigator iti PNP-Pinili.
Nabigbig ti nakamotorsiklo a ni Joffrey Gamponia, agtawen ti 35, karpintero ken residente iti Barangay Gabut Sur iti ili ti Badoc.
Segun kenni Gamit, agdependar to iti pisklaya no maipursige ti kaso a direct assault gapo ta saan da a makumpirmaran no inranta ni Gamponia ti mangpadungpar kenni Taccad.
Inlawlawag na nga iti panagimbestigar da ket agarop 100 a metro pay laeng ti kaadayo ni Gamponia iti ayan ni Taccad a mangiyus-uswat ti Opan Sita idi pagsarsardengen ti hepe gapo ta saan a nakahelmet ti lalaki.
Nupay kasta, kunana a saan a nagsardeng ni Gamponia ken nagderetso a rason ti pannakadungpar na kenni Taccad.
Kas resulta, agpada a naipurwak da Taccad ken Gamponia iti agarop dua agingga iti tallo a metro manipud iti nagtakderan ti pulis nga isu ti nakadungparan na.
Agpada a naitaray dagiti dua iti Karmelli Clinic and Hospital Inc. Iti Barangay Apatut-Lubong iti ili ti pinili ngem naiyakar da iti Mariano Marcos Memorial Hospital and Medical Center iti ciudad ti Batac.
Inbatad na a basar iti attending physician iti Karmelli Hospital ket saan a nakainom ti nasanger ni Gamponia ken makasarita pay laeng.
Nupay kasta, kunana nga idi naiyakar daytoy iti ciudad ti Batac ket saanen a makasao ken iti agdama ket adda iti Intecsive Care Unit (ICU), idinto a ti hepe ket addan iti nasayaat a kondisyon.
Innayon ni Gamit nga awan ti medical history ni Gamponia kasta met nga awan ti madi a rekord na.
