LAOAG CITY – Naibasura ti kaso a pammapatay a naipila kontra iti agnagan iti Rolando Bugarin y Caoagas, agtawen ti 47, naasawaan ken residente iti Brgy. 3, Salbang, Paoay, Ilocos Norte ken John Doe.
Daytoy ket kalpasan a naduktalan a natayen ti nadakamat nga akusado.
Basar iti naawat a pammilin ti PNP-San Nicolas manipud iti opisina ti Provincial Prosecutor, Laoag City a pinirmaan da Atty. Maria Theresa E. Desierto, Associate Provincial Prosecutor ken inaprubaran ni Atty. Rommel G. Calupig, Assistant Provincial Prosecutorken Officer-In-Charge, nadismis ti nasao a kaso gapu ta ti akusado ket pimmusay idi Agosto 2018 bayat ti implementasyon ti search warrant operation idiay Biñan, Laguna.
Maipalagip a ni Bugarin ken john doe ti naipilaan ti kaso iti pannakapapatay ken ni SPO1 Perfecto Mike Joaquin y Agonoy, residente iti Bgy. San Pablo iti nasao nga ili idi Sept. 19, 2016 bayat nga adda ti biktima iti mismo a pagtaengan da babaen iti pannakapaltopaltog na.
