LAOAG CITY – Manamnama a maipilaan ita nga aldaw ti kaso kriminal ni PO2 Cember Tumbaga iti PNP-San Nicolas gapu ti panagpap-paputok na ti paltog iti sango a mismo ti nasao a kwerpo ti pulisya.
Malaksid ti daytoy, manamnama pay a mapilaan ti kaso administratibo ni Tumbaga kadwa a ni PO1 Lito Elise kalpasan a nagriri da bayat ti papanda panaginom iti maysa a videoke bar ti met laeng nasao nga ili.
Nupay kasta, nagkedked ni Tumbaga a nagpainterview iti Bombo Radyo mainaig ti sangsangwen na nga isyu.
Immunan nga inpasingked ni P/C/Insp. Angelito de Juan, ti Hepe ti Investigation Section ti PNP Prov’l Office nga imbestigaren da ti napasamak ken ipakat da ti rumbeng a maipataw a pannusa kontra kadagiti dua a pulis.
