LAOAG CITY – Inbatad ni Police Captain Johnveil Maramag, chief of police ti PNP-Marcos a nakasaganan ti dokumento para iti panangipila da ti kaso nga attempted murder kontra iti suspek ti napasamak a pammaltog iti Barangay Mabuti iti nasao nga ili.
Binigbig ni Maramag ti suspek a ni Ben Andres a residente iti Barangay Cali iti ili ti Dingras.
Iti inisyal nga imbestigasyon dagiti otoridad, napan nagpasyar ti apoko ti suspek iti balay ni Barangay Kagawad Eric Peralta iti Barangay Mabuti ken nadanon na dagiti uppat nga aggi-inom iti sango ti tianggi ti opisyal.
Inlawlawag ni Maramag a maipagarop a kinursunado dagiti uppat nga aggi-inom ti apoko ti suspek a napan nagpasyar rason a nagawid.
Nupay kasta, nagsubli ti apoko iti Barangay Mabuti ken kadwa nan ni Andres a nakalugan ti kurong-kurong ken nagpaputok ti paltog.
Kuna ni Maramag nga awan met ti nasugatan iti nasao a pammaltog ngem desidido dagitoy nga agipila ti reklamo kontra kenni Andres.
Naamoan a ti kangrunaan a motibo iti daytoy ket panagibales.
Kabayatanna, manarimaan met ti imbestigasyon dagiti otoridad seknan iti katatao ti suspek.
