(Update) LAOAG CITY – Kinakurang ti ebidensiya ti rason no apay a saan a nagpursige ti reklamo a panagibugaw weno human smuggling kontra ken ni Teddy Fiesta iti Bgy. 3 iti ili a Sarrat.
Daytoy ti imbatad ni P/C/Insp. Roldan Suitos Hepe ti Pulisya ti nasao nga ili.
Segun kenkuana, agpayso nga adda ti maysa a nagannak a nagkamang kadakuada mainaig iti pannakapukpukaw ti balasitang nga anak na nga agtawen ti 14 ngem naamuan da a sumursurot daytoy ken ni Fiesta.
Kuna na nga adda da pay dagiti nagkamang iti opisina da mainaig met laeng iti nasao a problema ngem agkurang da ti impormasyon.
Nupay no kasta, kuna ni Suitos nga adda sursuruten da nga anggulo ti nasao nga alegasyon a daytoy ita ti konsentrasyon da.
Mangnamnama ni Suitos nga addanto madiskubre a naan-anay nga ebidensiya tapno matuluyan da a pilaan ti kaso ti suspek nga immun-unan a naipilaan ti kaso gapu iti maipagarup a panaglako na iti paltog nga awanan ti lisensiya.
Iti agdama ket nakabalod ti suspek iti Ilocos Norte Prov’l Jail kalpasan a ginundawayan na ti nag-waiver.
