LAOAG CITY – Kinumpirmaran ni Mayor Albert Chua iti siudad ti Batac nga addan ti nagpositibo ti African Swine Fever (ASF) iti nasao a siudad.
Daytoy ket partikular iti Sitio Surgui ken Nagbaksan iti Brgy. Tabug.
Kuna ni Chua nga iti inisyal nga impormasyon a dimmanon kenkuana, adda ti 15 a baboy ti naalaan ti blood sample itay kallabes.
Inbatad na a manipod iti nasao a bilang ket 12 ti nagpositibo iti ASF.
Segun ti mayor, manarimaanen ti panagsagana ti siudad para iti culling pakairamanan ti pannakadeterminar ti pakaikalyan dagiti baboy.
Karaman pay ditoy ti pannakaisagana ti PPEs ken dadduma pay a ramit a mausar iti culling.
Mainaig iti daytoy, manarimaan ti panagimbestigar ti city veterinarian seknan ti naggapuan ti nasao a virus.
Kabayatanna, gapu iti kaso ti ASF iti siudad ti Batac ket maibilangen daytoy a red zone.
