LAOAG CITY – Kinumpirmaran ni Mr. Armand Curameng, iti Italy, a bumabbaba ti COVID-19 cases ken ado dagiti nalalaingan manipud iti nasao a virus iti Italya.
Kuna na a saanen a kas iti dati nga ado dagiti naapektaran kangrunaan idi bulan ti Marso ken umuma a paset ti bulan ti Abril.
Segun kenni Curameng, agoperar iti half-day dagiti sumagmamano a bars, kasta met ti Postal Office.
Inbatad na nga agngudo ti lockdown iti nasao a pagilian intono Mayo 3, ita a tawen.
Mamati ni Curameng a saanen a maialud-od ti lockdown gapu ta ad-ado dagiti malalaingan ken bumabbaba dagiti maimalmaldit a kaso ti COVID-19.
Mainaig iti daytoy, inlawlawag ni Curameng nga immado ti kaso ti COVID-19 iti Italya gapu ti kinabengngeg dagiti Italians gapu ti panagruwar da iti pagtaengan da ken agturturong da kadagiti bar wenno socializations.
Daytoy ti rason a pinaigetan dagiti otoridad ti patakaran ken inpatungpal da ti panagmulta kadagiti matiliw nga umabot ti tallo a ribo a pisos wenno katukad ti nasurok a 150 a ribo a pisos ti multa.
Kabayatanna, inpakaammo ni Curameng nga umabot iti 37,298 ti kaso ti COVID-19 iti Lombardy Region, ken manipud iti bilang ket 23,895 dagiti positibo pay laeng, 8,100 dagiti nalaingan ken 5,402 dagiti pimmusay.
