LAOAG CITY – Inbatad ni Mayor Joeffrey Saguid iti ili ti Dingras a bimmaba ti 50 a porsiento ti bilang ti kaso ti dengue iti nasao a lugar no ikumpara it napalabas a tawen.
Segun kenni Saguid, nagkiddaw isuna iti OIC ti Municipal Health Office a masapol kuma nga adda ti maiyuswat a fumigation wenno fogging kadagiti pagumukan ti lamok iti nagduduma a barangay tapno malapdan ti panagraira ti sakit a dengue.
Inlawlawag na a basar iti OIC ti Municipal Health Office a saan da pay a mabalin nga ideklara ti state of calamity gapo iti dengue gapo ta adda ti sursuruten da a pagannurutan.
Kunana a naideklara ti dengue outbreak iti ili da iti napalabas a tawen gapo ta ado dagiti biktima ti sakit a dengue ti naimaldit ken adda ti pimmusay.
Maipalagip a ti Barangay Espiritu iti nasao nga ili ti ummuna a naimaldit nga addaan ti kaso ngem maikapito ti ili a Dingras a kangatoan nga addaan ti kaso a dengue basar ti datos ti Provincial Health Office.
Kabayatanna, iti agdama ket umabot ti 48 a kaso ti dengue ti nasao nga ili.
