LAOAG CITY – Ibilang ni Dr. Rickson Balalio, ti mangidadaulo iti Provincial Health Office nga ad-ado ti kaso ti dengue ita a tawen no ikompara kadagiti naglabas a tawen.
Nupay kasta, kuna na a ti pagsayaatan na ket awan dagiti nairekord a pimmusay gapu iti nasao a sakit.
Inlawlawag ni Balalio a malaplapdan ti nakaro nga epekto ti sakit a dengue gapu kadagiti ipatpatungpal da a nagduduma a programa ken ti information campaign tapno mapakaammoan ti umili kadagiti rumbeng nga aramiden da.
Kuna na a ti dengue ti maysa kadagiti tututukan ti opisina na malaksid pay iti Human Immunodeficiency Viruk ken ti Leptospirosis.
Segun kenkuana, sipod idi bulan ti Enero ita a tawen ket umaboten iti 310 ti kaso ti dengue ditoy probinsya no sadinno a 120 manipud iti primero distrito ken 190 manipud met iti segundo distrito.
Gapu iti daytoy, nagballaag manen ni Balalio nga ugalien ti 5S, wenno ti Search and Destroy, Self-protect, Seek consultation, Support fogging ken sustain hydration.
