LAOAG CITY – Umabot iti nasurok a 36 a ribo nga indibidual ti naapektaran ti dengue virus iti umuna a paset ti Agosto ita a tawen idinto a ti bilang dagiti pimmusay gapu iti nasao a sakit ita a tawen ket ngimmato iti 546.
Basar iti Department of Health (DOH), nagtalinaed ti dengue uptrend ita a panawen ti panagtutudo gapu ta ti 29,021 a kaso a nairekord idi Hulyo 21-Agosto 3 ket ngimmato iti 25% idi Agosto 4-17, nga addaan ti 36,335 a kaso.
Arigna amin a rehiyon malaksid iti Mimaropa, Bicol Region, Zamboanga Peninsula, ken Bangsamoro ket ngimmato ti kaso na iti nasao a sakit iti umuna a lawas ti bolan ti Agosto.
Inrakurak ti Department of Health a sipud natappugan ti 2024 agingga iti Setyembre 6 ket addan ti pakabuklan a 208,965 ti kaso ti dengue, nangatngato daytoy ti 68% no ikumpara iti datos iti isu metlaeng a panawen idi 2023 nga addaan ti 124,157 a kaso.
Adda metten ti 546 nga indibidual a pimmusay gapu iti sakit a dengue ita a tawen.
Mainaig iti daytoy, nagpalagip ni Health Secretary Ted Herbosa iti publiko nga ipatungpal ti 4S strategy kontra iti dengue kas ti “Search and destroy breeding places; Secure self-protection; Seek early consultation; ken Support fogging or spraying in hot spot areas, kangrunaan na no panawen ti tudtudo.
