LAOAG CITY – Umaboten ti 1,203 ti pakabuklan a kaso ti Influenza-Like Illness wenno ILI iti Manila manipud idi Enero kalpasan a nakarekord ti 33 a baro a kaso ita a bulan ti Agosto.
Basar iti otoridad, adda pakainaigan ti panagngato ti kaso dagiti arig-trangkaso nga adda uyek ken panatengna iti agtultuloy a panagtudo ti pagilian.
Sinaruno daytoy ti leptospirosis a nakairekord ti 4 a baro a kaso ita a bulan a nangitunda iti pakabuklan a 556 a bilang ti kaso ken ti dengue nga adda pakabuklan a rekord a 2,541 kaso manipud Enero.
Nupay kasata, awan nairekord a kabaroan a kaso ti Cholera, Typhoid Fever, COVID-19 ken Severe Acute Respiratory Infection (SARI) iti suidad.
Binalakadan ti Department of Health ti publiko nga agridam kadagiti sintomas ken suroten dagiti simple nga addang tapno maprotehiran ti bukod a bagbagi ken ti komunidad.
Inallukoy pay ti ahensia ti siasinno man a makarikna ti sintomas ket insigida nga agpakonsultar iti kaasidegan nga ospital para iti alisto a pannakataming.
