LAOAG CITY – Kinumpirmaran ni Atty. Jason Perera, Sang Panglungsod member ditoy ciudad ti Laoag a na-acquit ti kaso ti kliyente na a ni Mr. Michael James Felipe, residente iti Barangay 10 ditoy ciudad.
Inbatad ni Perera a ti naisangsangayan ket saan laeng a na-acquit ti kaso no di ket minandar pay ti korte ti Philippine National Police-Internal Affairs Service nga imbestigaren na amin dagiti kameng ti pulisya a nangisayangkat ti operasyon.
Inpalgak ni Perera nga inaramid daytoy ti korte kalpasan a naduktalan basar iti naala na a Closed-circuit television (CCTV) iti pasdek a naibaga a nakaisayangkatan ti operasyon ket awan ti buy-bust a naiyuswat no di ket ginammatan lattan dagiti kameng ti pulisya ni Felipe ken ti inparuk-at da nga informant ket pada da metlaeng a pulis.
Inpetteng na a makapadismaya iti judiciary gapu ta manmano laeng a kaso ti maalaan ti Closed-circuit television (CCTV).
Kagiddan iti daytoy, inrakurak ni Perera a saanna nga ammo no ania ti nagbanagan ti kaso ti kliyente na no bilang awan ti Closed-circuit television (CCTV) a nangipaneknek nga awan ti napasamak a buy-bust operation.
Inpaganetget pay ni Perera a dagiti naala a maipagarop a shabu ken ni Felipe idi Disyembre 5, 2021 ket naimula gapu ta iti korte ket dua laeng ti mabalin da nga ipataw iti akusado, guilty wenno not guilty.
Inulit manen ni Perera a saan laeng a not guilty ti desisyon ti korte iti kaso ti kliyente na no di ket inmandar na pay ti pannakaimbestigar dagiti kameng ti pulisya a nangtiliw idi ken ni Felipe.
Mainaig iti daytoy, inpakaammo ni Perera a no mapaneknekan nga adda ti nagbasolan dagiti maseknan a kameng ti pulisya ket dakkel ti posibilidad a maikkat da iti serbisyo gapu ta saan laeng nga administrative case ti pagsasaritaan no di ket adda pay ti planting of evidence.
Maipalagip a natiliw ni Felipe idi Disyembre 5, 2021 iti Barangay 8 ditoy ciudad ti Laoag no sadinno a nakakumpiskar dagiti otoridad iti ikot na ti innem a sachet a naglaon ti maipagarop a shabu, ngem naglikudan ti suspek a bagina dagiti naala nga ebidensya kontra kenkuana.
