LAOAG CITY – Umaboten iti 5,486 ti nairekord a pasyente ti leptospirosis iti intero a Pilipinas manipod iti Enero agingga iti Agosto 27 ita a tawen.
Segun iti Department of Health (DOH), namnamaen a ngumato pay ti kaso ti nasao a sakit kadagiti sumarsaruno a lawas, nupay nababbabaa paylaeng ti bilang no ikompara iti kapada a panawen iti napalabas a tawen.
Agpaot agingga iti dua a lawas ti incubation period ti bakterya a mangitunda ti leptospirosis.
Inbatad ni Department of Health Undersecretary Gloria Balboa, ti agdama a datos a 5,486 manipod iti Enero agingga iti Agosto 27 ket 23% a nababbaba no ikumpara iti 7,163 a kaso iti kapada a panawen idi 2025.
Nupay kasta, naiget a banbantayan ti Department of Health dagiti rehiyon nga addaan ti kaadoan a kaso ti leptospirosis.
Ti kangatoan ti bilang ti kaso ket ti Cordillera Administrative Region nga addaan ti 542 a kaso, sumaruno ti Metro Manila nga addaan ti 521, ken Central Luzon nga addaan ti 391 agingga idi Agosto 22.
Inpakaammo ni Mercado a karaman kadagiti ospital a mabanbantayan ket dagiti adda iti Ilocos Region, Cordillera Administrative Region, Cagayan Valley, Central Luzon, ken National Capital Region.
