LAOAG CITY – Umaboten iti siyam a kaso ti panaglako ti maladaga ita a tawen, naartapan nan ti walo a kaso a nairekord iti intero a 2025.
Daytoy ket basar iti Philippine National Police Women and Children Protection Center (PNP WCPC).
Gapu iti daytoy, inbatad ni Philippine National Police Women and Children Protection Center chief Brig. Gen. Maria Sheila Portento nga ad-adda pay a paigetan da ti agmonitor iti online platforms nga isu ti pakailaklakoan dagiti dadduma a maladaga.
Iti baet daytoy, inadmitir ni Portento a dakkel a karit para kadakuada no kasanu da a mamonitor amin dagiti possible nga agilako ti maladaga ditoy pagilian.
Maipalagip nga idi 2024 ket nakairekord laeng ti Philippine National Police Women and Children Protection Center ti uppat a kaso ti panaglako ti maladaga.
Inpakaammo ni Portento a dagiti maladaga ket mailaklako manipod iti 8 ribo a pisos agingga iti P135,000.
Inpetteng na a kas nagannak ket nakasaksakit ti riknana a makakita kadagiti ubbing nga addaan ti price tag ken arigna banag a mailako.
Immunan nga adda dagiti naarestar a naglako ti maladaga no sadinno a ti rason da ket naaramid da laeng daytoy gapu iti kinarigat ti panagbiag.
Mainaig iti daytoy, nagballaag ni Portento iti publiko a ti mairaman iti kastoy a practice ket mabalin a sumango ti tungpal biag a pannakaibalud ken mamulta agingga iti P5 million kas nailanad iti Republic Act No. 9208 wenno ti Anti-Trafficking in Persons Act; wenno 40 a tawen a pannakaibalud ken multa a P1 million iti babaen ti Republic Act No. 7610 wenno ti Special Protection of Children Against Abuse, Exploitation and Discrimination Act.
