LAOAG CITY – Naragsak nga inpakaammo ni Dr. Loida Valenzuela, Provincial Veterinarian ti Provincial Veterinary Office a bimmaba ti mairekrekord a kaso ti rabies ditoy probinsia.
Segun kenkuana, daytoy ket kalpasan nga adda ti 86 a kaso ti rabies ti nairekord laeng no idasig iti 186 a datos iti napalabas a tawen.
Inbatadna nga adda ti ipaay ti Department of Agriculture – Regional Office I nga anti-rabies vaccines para ditoy probinsia banag a dakkel a tulong ken mainayun iti buffer stock kadagiti nagduduma a Local Government Units ditoy probinsia.
Inlawlawagna nga inabisoanna dagiti staff ken personnel ti Provincial Veterinary Office a saanen a bakunaan dagiti ayup kas ti aso ken pusa no masakit dagitoy a posible nga isu ti rummuar a rason no apay a nagsakit dagitoy.
Innayonna a kinasaritana dagiti nagduduma a lokal a gobierno ditoy probinsia a no bilang adda dagiti aso wenno pusa a natay iti kalsada ket dagusda nga i-report iti opisinada tapno maipadalan pay laeng dagitoy iti test.
