LAOAG CITY – Nagselebrar iti maika-10 a panagkasangay ti nabirngasan nga “Oldest Surviving Panda Triplets” iti napalabas nga Hulio.
Naammoan a da Meng Meng, Shuai Shuai ken Ku Ku ket naipasngay idi Hulio 29, 2014 iti Chimelong Safari Park idiay Guangzhou, China.
Maysa a naisangsangayan nga agpasngay ti triplets ti maysa a panda isu a maibilang nga espesyal daytoy a pasamak iti intero a China.
Iti history dagiti Panda idiay China, adda laeng uppat a kaso ti triplet birth. Immuna a naipasngay ni Meng Meng ti kakaisuna a babai kadagiti tallo, sinaruno daytoy ni Shuai Shuai ken naudi ni Ku Ku.
Naiyuswat ti birthday celebration iti nasao a safari park no sadinno sinaganaanda ti cake dagiti triplets. Naaramid ti cake iti bamboo shoots, carrots, fruit chunks ken honey water.
Iti agdama, maysa metten nga ina ni Meng Meng kalpasan a nagpasngay iti napalabas a bulan.
